Hai unha semán asistín a un acto cultural argallado polo Ateneo Eumés. Unha personaxe de Galicia, galego de adopción, de convivencia e de convencimento, e ademáis galeguista, ainda que oriundo de Ciudad Real, estivo en Pontedeume. Xavier Alcalá, o autor de "A Nosa Cinza", de "Contos do Impaís", de "Entre fronteras" estivo a falar da súa lingua, o galego. Pode que non guste a súa particular personalidade, ou o seu sempiterno afán de polemizar, ou incluso a súa actividade profesional no mundo da tecnoloxía, pero do que non cabe ningunha dúbida é de que se trata dunha personaxe importante para Galicia no eido cultural, literario e tecnolóxico.
Pois ben, a pesar diso, e como ven sendo xa costume nos actos do Ateneo, ou do Concello, ou de calquera outra asociación a asistencia de público foi pésima, e quédome curto. Non sei o que falla, non sei si fallamos os eumeses, a publicidade ou os conferenciantes. Neste caso descartaría a terceira opción polo que dixen no anterior parrafo ao que habería que engadir a súa permanente relación con Pontedeume aumentada se cadra coa colaboración nos últimos tempos con Manuel Molares para a elaboración da súa última novela.
Sempre dixen que en Pontedeume temos o que merecemos, que temos uns políticos fiel reflexo da nosa actitude vital, que a nosa hostelería é máis ou menos a que nos gusta, que o noso comercio non avanza máis porque nos mesmos non lle deixamos. Máis, hai un sector no que na milña sectaria opinión temos máis do que nos merecemos. Estou a falar do asociacionismo... Temos en Pontedeume unha morea de asociacións culturáis, deportivas, gastronómicas..., que non paran de argallar unha e outra vez actividades, concertos, conferencias, mostras, competicións; e os eumeses veña a fallarlles unha e outra vez (salvo honrosas excepcións). Non hai conferencia con máis de dez ou doce asistentes, salvo que inclua pinchos, nin mostra ou exposición con visitas dos colexios ou apoio en forma do Concello, nin concerto sin criítcas amargas por parte dos que obtiveron menos rendementos cos do lado.
E os asociacionistas seguen a darlle aos eumeses na testa con cultura no sentido máis amplo. A ver si co tempo vamos collendo o hábito de asistir a estes actos, ainda que sexa porque si.
